Zum Kirchentag vom Brüderpaar ein märchenhafter Kommentar
Armood un Demood sind de Biärwe in den Hiëmel

Et was maol en Küëninkssuohn, de gonk henuut in’t Feld un was naodenksk un trurig. He saog den Hiëmel, de was so schöön un klaor un blao; dao söchtede he un dach: Wu mot et di iärst dao buowen sien? Dao kam he en armen, ollen Man in de Möte, den küërde he an: „Wu kan’k wul in den Hiëmel kuomen?“ De Man sag: „Düör Armood un Demood. Tüh di mien versliëten Tüüg an, trek 7 Jaore in de Wiäld un lähr iär Elend kennen. Niëm kien Geld med. Büs hüngrig, fraog en medledig Hiärt üm en Stük Braud. So kümps den Hiëmel naige.“

Donnerstag, 17.05.2018, 17:05 Uhr

Dao trok he sienen prächtigen Rok uut un dat Prachertüüg an, gonk in de Wiäld un draug graut Elend. He nam nix äs en lük Iäten, sag nix, sunnern biäde to den Härn, he möch em tolest in den Hiëmel upniëmen.

Äs de Jaore üm wäören, kam he wier an’t Slot van sienen Vader, män nüms kande em. He sprak to de Deiners: „Sägt miene Öllern, dat ik wierkuomen sin!“ Aower de Deiners wullen dat nich glaiwen, lacheden un laiten em staon. Dao raip he: „Sägt doch miene Bröërs, se söllen harunnerkuomen. Ik möch iär so gärne wiersein.“ Dat wullen se auk nich, män endliks gonk enen hen un vertal et de Küëninkskinner. Aower de glöffen dat nich un schiärden sik nich dao üm.

Dao schreef he en Breef an siene Moder, in wat för’n Elend he wäör, sag apat nich, dat he iär Suon wäör. Dao lait em de Küënigin uut Medleed en Plas unner de Trappe anwiesen un dagesdag düör twee Deiners Iäten brengen. Aower de ene was laige un dach: „Wat sal för den Pracher dat guëde Iäten?“ He hol et för sik of gaf et de Rüëns un broch den swacken, afteerden Prinsen blaots Water. De annere apat was ährlik un broch em, wat he för em kreeg. Et was weinig, doch kon de daovan en Tiedken liäwen un was daobi heel gedüllig, bes dat siene Swäkte ümmer grötter wuor. Dao bad he dao üm, dat hillige Aobendmaohl to kriegen.

Wu et nu unner de halwe Misse is, fankt van söws alle Klocken in de Stadt un in de Ümgiëgend an to lüden. De Kaplaon geit nao de Misse to den armen Man unner de Trappe, un dao lig de dao daud, in de ene Hand ’ne Rause, in de annere ’ne Lilge, un an de Siete en Pupeer, dao up steit siene Geschichte schriëwen.

Äs he äërd was, wos up de ene Siete van’t Graf ’ne Rause, up de annere ’ne Lilge haruut.

  Hannes Demming

Wörde

Brüderpaar – Jacob und Wilhelm Grimm; Biärwe – Leiter; Pracher –Bettler; afteerd – abgezehrt; äërn – begraben; wos – wuchs

...
Anzeige
Anzeige
https://event.yoochoose.net/news/705/consume/10/2/5746986?categorypath=%2F2%2F84%2F61%2F198%2F57671%2F
Mehr als 58.000 Besucher sehen "Udos 10 Gebote"
Der Rockmusiker Udo Lindenberg.
Nachrichten-Ticker