Gestaltung oder Verunstaltung
Fr., 03.02.2012
Iärger off Plasseer, dat is de Fraoge!
Der Kiepenkerl
Is’t blaots Tofall, leiwe metmönsterske Fröndinnen un Frönde van Frielechtkunst in use Binaoh-Kulturhaupstadt, dat de „Kiepenkärl“ up den Spiekerhoff un „Knecht“ un „Magd“ up den Luggereiplass jüst ene Wiäke vüör den „Rundgang 2012“ van de Kunstakademie amplass den kaollen Metall-Anlaot en lück Menskenfarwe annuommen häbt?
|
Wisse denkt et Ju no, dat hier verliëdenen Saoterdagg en Photo van den „nieën“ Knecht vüör dat Piärd to seihn was un dat Hüöwel-Hannes de Verännerung gärne lieden moch.
Ick draff huoppen, dat Ji’t nich för en Teken van westfäölske Häbberechtigkeit un Sturheit ästimeert, wann ick nomaol dao up trüggekuomm, un ick häff sowat auk süss nich för Bruuk, aower – met Verläöff – auk de „modifizeerte“ Kiepenkärl sägg mi wat, un twaorens mähr äs de, an den wi us alle wüehnt häbt.
Wann de Stadt, we auk ümmer dat sien magg, dao van „beschädigen“, „verunstalten“ un sowat küert, is dat ’ne städtske Interpretation, wao – weet Apollo! – nich ümmer Kunstverstand ächter sitten mott.
Ick riskeer’t un sägge driest: Ick sympathiseer met de, we dao an’t Wiärk west sind, un ick könn mi wiägen de interessante, baolle möch ick säggen plasseerlicke Idee vüörstellen, dat van de Binnenstadt en paar Fiäm harüöwerlaupt nao den Leonardo-Campus an der Stemmertske Straote, wao siet ährgistern un no bes muorn de Uutstellung „Rundgang 2012“ läöpp.
Niäbenbi: En Besöök dao lauhnt sick.Natüürlick is so’n Naomaolen hier nich üöwerall müeglick, tom Bispiël nich bi den Crucifixus, Edith Stein, Anna Catharina Emmerick, Kardinaol van Gaolen un Jan van Leyden up den Horstebiärg; denn dao dreiht et sick nich üm Allegorien orre Symbole.
Aower de 1000 Euro för dat Entfiärwen bi Kiepenkärl un Knecht un Magd söll „de Stadt“ sparen, de Tied, den Riängen orre dat Skulpturprojekt 2017 afwaochten un de Anzeige met Gnöcheln trüggeniëhmen. De is, met Respekt säggt, blanke Aperie.
Standort
domplatz, münster
