Phantasievolle Erfindung, raffinierte Verführung, clevere Geschäftsidee?
O Pokémon, o Pokémon!

O Pokémon, o Pokémon,

Samstag, 23.07.2016, 06:07 Uhr

 
  Foto: Sophia Demming

du wünnerlik Kretüür,

för di en Word to finnen schient

mi bol unmüëglik hier.

Sind de, we sik di uutdacht häbt,

nu genial of daor?

Van Moos apat verstaoht se wat,

dat is mi nu al klaor.

Wat för Figüürkes swemt, kruupt, fleigt

harüm nich in dien Riek

of staoht wu raore Planten dao,

sik ähnlik, män nich gliek?!

We sik maol wecke fangen will,

mot siene Döppen wied

losmaken un topacken auk

akraot tor rechten Tied.

Un wat för Namens alle häbt!?

Achthunnerd sind et wul!

De Liste tüügt van Phantasie

un is no lang nich vul.

De Wörde klingt mangs but, mangs sööt,

klingt früëmd un doch bekand.

Un wil wel butenkops de lährn,

hät he en swaoren Stand:

Ponita, Kleinstein, Gallopa,

Glumanda, Habitak,

Alpollo, Hypno, Lektrobal,

Tangela, Webarak,

Ledyba, Arktos, Dragonir,

Togepi, Lithomith,

Golgantes, Flemmli, Panekon,

Emolga, Castellith.

Un wao düt Volk harüm sik drif!

Up’t Markt un an de Ao,

auk in den Bus nao Gievenbiëk,

de Saoltstraot’ hier un dao,

Kanunnengrawen un Prumnaod’,

haug an’n Lambertitorn,

an Slot un Raodhuus, bi Polßei

un in’n Botaansken Gorn.

Bi Pinkus an de Lokuswand

fonk kuors en Bauz üörnswel,

un würklik un waohrhaftig sat,

wat m’ nich glaiwen söl,

up Hannes’ Pläte doch en Schlurp

tohaup met en Ho–Oh ;

de pock sik Hannes’ Dochterkind

un no en Kinoso.

De graute Fraoge is apat,

wu lang dat Wiärks sik hölt.

Dat ene nämliks, dat steiht fast:

Et wärd en Bunken Geld,

Milliarden wärdt drmet verdent.

Män sind iärst sat de Lüü,

dan is et met den helen Hype

rukzukrazfaz vüörbi.

ik glaif, dat du för mi

nix büs. De Tied gönk mi leed af

för so’ne Spiëlerie.

Auk gaoh ’k de Jägers uut den Weg,

de wööst un wild so faak

gestikuleert un braakt. Mangs wärd’t

gefäöhrlik bi de Saak’.

Blief van de Bränn’ mi, Pokémon !

Ik set mi in en Hook,

damp miene Piep’, philosopheer

of liäse in en Book.

Un kümp mien Wichtken up Besöök,

dan frei ik mi un leg

dat Book, un si et no so guëd,

heel gau un gärne weg.

Hannes Demming

 

Anzeige
http://event.yoochoose.net/news/705/consume/10/2/4187845?categorypath=%2F2%2F84%2F61%2F198%2F57671%2F
Nachrichten-Ticker