Hüöwelspäöne
Legende van Sünte Tüns siene Fiskpriäge

Nachbesinnung zum Tag der Fische (22. August)

Freitag, 25.08.2017, 11:08 Uhr

Dat Sünte Tüns van Paddewat

guëd un verständlik priäged hät,

de frummen Christen wiëtet dat.

Reet obsternäötske Sünners met,

mook sture Köppe week un sacht,

friegiëfsk den ollen Gnesepinn.

Sien Word , dat har Gewold un Macht,

gonk an de Nür’n, an Hiärt un Sin.

De wildste Flukster wuor heel tam,

dat Liëderwams bleef nu an Huus,

uut’t Muul van Gaffeltangen kam

nich ene Laige mähr: en Gruus

för Saotan Höllenfürst. De wul

pattu nu in sien wööst Venien

– so gräsig was he un so dul –

den Hil’gen maken üörndlik Pien.

He stoppede doch bi ’ne Miss’

de Lüde iähre Aohren to,

wu dat et Düwels müëglik is.

Un Sünte Tüns mog priägen so

hal, äs he wul, se häörden nix

un fongen to vertellen an,

to fechten of to glapken fix.

Dat hät vaxeerd den guëden Man.

He raip: „Gaoht män nao Huus to Diske!

Ik priäge nu de stummen Fiske.“

Gesägd, gedaon! He gonk an’t Water.

Dao störde em kien dum Gequater.

He raip: „Nu gau de Stiärtkes weggen,

ji Fiske! Ik möch ju wat säggen!“

Dao kammen, bolle nich to tellen,

de Snöke un de Biëk–Forellen,

Karausken, dusend Modderlieskes

de Stiëklinge un Äöle füskes,

Steenbieters, Niëgenaugen, Schleien

un Störs un Stinte, Ukeleien

un Brassen un . . . ik fin kien Enne.

He hol haug siene hil’gen Hänne.

Niesgier’g uut’t Water se dao böörden

de Köppe, un heel stilkes häörden

se, wu he siene Priäge hol.

Of de düt Publikum gefol,

is bes vandage nich haruut.

He sprak nich gau, män temlik luud.

Auk is bekand nich, wat he sag.

Dat Wörde met viël Üöwerlag

drin wäören, dat mag wul so sien.

He küërde siëker frum un fien.

Män wat was nu dat Resultat?

En Schaden maakt hät’t nich. Apat

äs Sünte Tüns toguëderlest

sien AMEN sag, is’t dat auk west.

Priägd hät he lange un met Füër.

Sien Publikum swemt trügge wier.

Natuur geiht iähren eeg’nen Pat

un kent blaots dat Natuurgesat.

Se brük us Mensken wisse nich.

Se is Natuur un blif un swig.

De Mensk is män Experiment.

Un wan de Mensk dat nich erkent,

nich wanners annimp kloke Lähr’,

nä, denkt, he wäör de Baas un Här,

dan gif’t den Mensken bol nich mähr.

Hannes Demming

Wörde

obsternäötsk – verstockt; friegiëfsk – freigiebig; Nüren – Nieren; Flukster – Herumtreiberin; Gaffeltange – lügnerische, zänkische Frau; glapken – unkontrolliert lachen; vaxeren – ärgern; Snöke – Hechte; Ukelei, Brasse – Karpfenfische; temlik – ziemlich; se swig – sie schweigt

...
Anzeige
http://event.yoochoose.net/news/705/consume/10/2/5100403?categorypath=%2F2%2F84%2F61%2F198%2F57671%2F
Traktoren-Konvoi legt Verkehr in Münster lahm
Landwirte-Protest gegen Argarpaket: Traktoren-Konvoi legt Verkehr in Münster lahm
Nachrichten-Ticker