1. www.wn.de
  2. >
  3. Archiv
  4. >
  5. Slaiperige Grautstadt?

  6. >

Zweischneidiger Spitzenwert in der Lärmstatistik

Slaiperige Grautstadt?

wn

Nu weet et de hele Wiält, leiwe metmönsterske Fröndinnen un Frönde van Liäwensqualität: Mönster met siene Akustik ligg, wat „luut“ un „liese“, „hall“ un „sachte“, Krach un Stillte amparteert, in Düütskland heel buowenan, biätter säggt, an dat allerünnerste Enne van den Stiärt van de fraunhoferske Dezibel-Statistik, tominnst, wat de Grautstiä angeiht.

Viële freit sick üöwer dütt „Ranking“, äs de Fackchinesen et benöömt; aower de wat schüllkoppt auk bedenklick. Se häbt vüöraf all Twievel, wu dat so ´ne Tabelle tostanne kümp, un ästimeert Statistik üöwerhaups äs ´ne besunnere Art van Laigen; un tweddens is nao iähr Meinen de Titel „leiseste Großstadt“ gar nich so gued för Mönster siene Reputation. To düsse Suorte möch ick mi tellen.

Wu sall dann enen, we an den - Vergiëwung! - Hindenburgplass wuohnt orre an de Wulbiëkske, Warenduorpske, Weselske, Stemmertske, Greivenske Straote, an den Ring, an de Gilgenporte, de Nieporte, we an de Wiäkenennen in de Aoltstadt de Binnen- un Butengastronomie verflöökt un dat Jaohr hendüör de baolle unendlicke Riege van Hafenfeste, Summerfeste, Wienfeste, Stadtfeste, Straotenfeste, Veerdelfeste, Oktoberfeste, Siënd, Flauhmarkt, Wiehnachtsmarkt, Marathon, Giro usw. henniëhmen mott, wu sall de up den Gedanken kuommen, dat m´ so ´ne Statistik truen draff?

Startseite